14-nji iýunda Türkmenistanyň futbol çempionatynyň 13-nji tapgyrynyň çäklerinde duşuşyklar geçirildi. Maryda ýerli "Merw" bilen paýtagtyň "Ahal" topary duşuşdy, Türkmenbaşynyň stadionynda bolsa "Şagadam" bilen "Altyn Asyr" ýüzbe-ýüz geldi.
Mary şäherinde geçirilen duşuşykda myhmanlar başdan tä ahyryna çenli oýunda agdyklyk etdiler. "Ahalyň" toparlaýyn hüjümleri netijesinde 5-nji minutda Alibek Abdyrahmanow hasaby açdy. 41-nji minutda "Merw" toparyň oýunçysy Şöhrat Owmadow hasaby deňledi. Ýöne bu olaryň soňky şatlygy boldy. Ikinji ýarymda Elman Tagaýew 11 metrlik urguda tapawutlandy, yzysüre Magtymberdi Berenow hem gol geçirdi — netijede "Ahal" garşydaşyny 3:1 hasaby bilen ýeňdi.
Duşuşyk örän gyzgalaňly bolup, onuň dowamynda üç futbolçy meýdançadan çykaryldy.
Türkmenbaşydaky duşuşyk bolsa ýerli janköýerleriň şatlygyna sebäp boldy. "Şagadam" topary ilkinji ýarymyň soňunda Mekan Aşyrowyň goly bilen öňe çykdy. Ikinji ýarymda Süleýman Mirzoýew hasaby 2:0 ýetirdi. "Altyn Asyr" jogap hökmünde diňe bir gol geçirmegi başardy. Ony Zafar Babajanow 84-nji minutda geçirip tapawutlandy. Netijede, "Şagadam" möhüm ýeňiş gazandy — 2:1.
