10-njy oktýabrda futbol boýunça Türkmenistanyň ýaşlar birinjiliginiň 22-nji tapgyrynyň çäginde iki duşuşyk geçirildi. Balkanabatda «Nebitçi II» topary «Şagadam II» toparyndan 3:0 hasabynda üstün çykdy, Aşgabatda «Altyn Asyr II» topary «Aşgabat II» toparyny 4:2 hasabynda ýeňdi.

«Nebitçi II» bilen «Şagadam II» toparlarynyň arasynda geçirilen duşuşykda hasaby 19-njy minutda Ysmaýyl Annagulyýew açdy, Elýas Agöýliýew bolsa 74-nji minutda artykmaçlygy artdyrdy. 76-njy minutda «Şagadam II» toparynyň oýunçysy Wadim Beçin öz derwezesine top geçirdi — gol «Nebitçi II» toparynyň hasabyna ýazyldy. «Nebitçi II» toparyndan Berdiguly Allaberdiýew (72-nji minut) we Ysmaýyl Annagulyýew (78-nji minut), şeýle hem «Şagadam II» toparyndan Didar Nazjanow (40-njy minut) duýduryş aldylar.

Türkmen paýtagtynda geçirilen duşuşykda «Aşgabat II» toparynyň düzüminden Geldimyrat Çolukow (25-nji minut) we Ýakupberdi Baýramgeldiýew (43-nji minut) tapawutlandylar. «Altyn Asyr II» topary üçin Meýlis Gurbandurdyýew (32-nji minut, 11 metrlik jerime urgusyndan), Orazguly Orazgulyýew (42-nji we 90-njy minutlar) we Mäti Hojaberdiýew (65-nji minut) gol geçirdi. Bu duşuşykda «Aşgabat II» toparyndan Begmyrat Pirkulyýew (60-njy minut) we Ýaran Hojagulyýew (90+1-nji minut) duýduryş aldylar.