«Nebitçi» topary 20-nji maýda Balkanabatda ýerleşýän sport toplumynda geçirilen futbol boýunça Türkmenistanyň çempionatynyň 9-njy tapgyrynyň duşuşygynda «Merw» toparyny 2:1 hasaby bilen ýeňdi.

Öý eýeleriniň düzüminde topy garşydaşyň derwezesine Serdar Tukiýew we Salim Umarow geçirdiler. «Merw» Maksat Çagbalyýewiň tagallalary bilen 83-nji minutda hasapdaky tapawudy diňe azaltmagy başardy, emma duşuşygyň gidişini üýtgedip bilmedi.

Iň gyzykly oýun «Altyn Asyr» bilen «Köpetdag» toparlarynyň arasynda bolup, ol 3:5 hasaby bilen tamamlandy.

Arslan Saparow Aşgabat şäheriniň Büzmeýin etrabyndaky Sport toplumynda geçirilen duşuşykda 32-nji, 42-nji we 50-nji minutlarda garşydaşyň derwezesine top geçirip, het-trik etdi. Emir Berdiýew 25-nji we 45-nji minutlarda iki gol goşdy. «Altyn Asyr» toparynyň düzüminde Bagtyýar Gürgenow (17-nji minutda), Röwşen Halmämmedow (34-nji minutda) we Myrat Annaýew (90+3') tapawutlandy. Duşuşygyň ahyry gyzyl kartlar bilen çylşyrymlaşdy: soňky minutlarda Mekan Amannyýazow (ikinji duýduryş) we «Köpetdagyň» oýunçysy Batyr Geldiýew meýdançadan çykaryldy.

«Aşgabat» stadionynda geçirilen «Arkadag» — «Ahal» duşuşygynda «Arkadag» topary 4:0 hasaby bilen ynamly ýeňiş gazandy. Begenç Akmämmedow 27-nji minutda hasaby açdy, Daýanç Meredow bilen Resul Hojaýew 68-nji we 70-nji minutlarda tapawutlandy, 78-nji minutda Rahman Myratberdiýew garşydaşyň derwezesine ýene bir top geçirdi.

Türkmenbaşy şäherindäki «Şagadam» stadionynda geçirilen «Şagadam» — «Aşgabat» duşuşygynda myhmanlar 0:2 hasaby bilen ýeňiş gazandy. Garşydaşyň derwezesine topy Merdan Muhadow (12-nji minutda) we Nurulla Reýimbaýew (63-nji minutda) geçirdiler.