«Arkadag» we «Ahal» futbol toparlary 27-nji dekabrda Türkmenistanyň Kubogyny almak ugrunda final oýnunda duşuşarlar. Ýurduň ikinji möhüm klub baýragyny almak ugrundaky aýgytly duşuşyk Arkadag şäherindäki adybir stadionda geçiriler.

Duşuşyk sagat 15:00-da başlanar. Duşuşygyň baş emini hökmünde Arkadag şäherinden Berdimämmet Atdyýew bellenildi. Oňa Daşoguzdan Yhlas Kuranbaýew we Aşgabatdan Ýusup Jumamyradow kömek ederler. Aşgabatly Eziz Ýazmyradow ätiýaçdaky emin bolar.

Duşuşygyň inspektory edilip Aşgabatdan Begenç Allaberdiýew, komissary hökmünde bolsa Marydan Ýeňiş Nazzyýew bellenildi.

Soňky iki möwsümde bu toparlar Türkmenistanyň Kubogynyň jemleýji oýnunda eýýäm duşuşypdylar. Iki ýagdaýda-da ýeňşi «Arkadag» gazanypdy.