AFK-2 Çempionlar Ligasynyň toparlaýyn ýaryşynyň dördünji tapgyry türkmen futbol klublary bolan «Arkadag» we «Ahal» toparlary üçin deňme-deň tamamlandy.
«B» toparda çykyş edýän Türkmenistanyň häzirki çempiony geçen möwsümiň jemleri boýunça Kataryň Ýyldyzlar Ligasynda (iň ýokary bölümde) dördünji orny eýelän «Al-Ahli» toparyny «Arkadag» stadionynda 10 müň tomaşaçynyň goldawy bilen kabul etdi. Oýnuň ikinji ýarymy «Arkadag» toparynyň göz-görtele artykmaçlygynda geçdi, olar ýeňiş gazanmak üçin köp tagalla etdi, emma myhmanlar 1:1 hasabyndaky deňligi elde saklamagy başardylar.
Başga bir türkmen topary, ýagny «Ahal» topary «C» toparyň dördünji tapgyrynda Yspyhanda Eýranyň «Sepahan» topary bilen oýnady. Malaýziýaly FIFA emini Razlan Joffri Aliniň eminlik eden bu oýny «Nägş-e jähan» stadionynda 8050 tomaşaçynyň öňünde bolup geçdi. «Ahal» topary 2:2 hasabynda deňme-deň oýnamak bilen, 1/8 finala çykmak mümkinçiligini elden gidirdi.
Ozal Türkmenistanyň wise-çempiony Hindistanyň «Mohun Bagan» toparyny 1:0 hasabynda ýeňipdi, ýöne Hindistanyň çempionynyň oýnamak hukugyndan mahrum edilmegi sebäpli, bu netije ýatyryldy.
