Hormatly Prezidentimiz Serdar Berdimuhamedow 2-nji noýabrda Ministrler Kabinetiniň Başlygynyň orunbasary Taňryguly Atahallyýewiň hem-de welaýatlaryň häkimleriniň gatnaşmagynda sanly ulgam arkaly iş maslahatyny geçirdi. Maslahatda ýurdumyzyň oba hojalyk toplumynda alnyp barylýan möwsümleýin çäreler, durmuş-ykdysady ösüş maksatnamalarynyň ýerine ýetirilişi hem-de ýakynlaşyp gelýän baýramçylyklara taýýarlyk meselelerine garaldy. Bu barada Türkmenistanyň Döwlet habarlar agentligi habar berdi.

Iş maslahatynyň barşynda welaýat häkimleri we wise-premýer oba hojalyk meýdanlaryndaky işleriň ýagdaýy barada hasabat berdiler. Bellenilişi ýaly, häzirki wagtda ýetişdirilen pagta hasylyny ýitgisiz ýygnap almak, obalaşdyrylan tehnikalary doly güýjünde işletmek we bugdaý ekişini agrotehniki möhletlerde tamamlamak boýunça giň gerimli işler alnyp barylýar. Şeýle hem güýzlük ýeralma, gök-bakja, Daşoguz we Lebap welaýatlarynda şaly, Mary welaýatynda bolsa gant şugundyrynyň hasylyny ýygnap almak hem-de ilata ýetirmek boýunça degişli çäreler görülýär.

Mundan başga-da, welaýatlardaky bilim, medeniýet, jemgyýetçilik edaralarynyň hem-de ýaşaýyş jaýlarynyň ýyladyş ulgamlarynyň gyş möwsüminde kadaly işletmegini üpjün etmek boýunça alnyp barylýan taýýarlyklar Barada bellenip geçildi. Şeýle hem ýurdumyzda geçiriljek ählihalk bag ekmek dabarasyna, giňden belleniljek Hasyl toýuna taýýarlyk görmek we ulanmaga berilmegi göz öňünde tutulýan desgalaryň gurluşyk hilini gözegçilikde saklamak meseleleri barada hasabatlar diňlenildi.

Hormatly Prezidentimiz Serdar Berdimuhamedow hasabatlary diňläp, oba hojalygynda örän jogapkärli möwsümiň dowam edýändigini belledi we pagta ýygymyny ýitgisiz geçirmek, bugdaý ekişini öz wagtynda tamamlamak babatda anyk tabşyryklary berdi. Döwlet Baştutanymyz ýyladyş ulgamlarynyň kadaly işlemegini gazanmagy, bag ekmek dabarasyna we Hasyl toýuna ýokary derejede taýýarlyk görmegi tabşyryp, maslahata gatnaşanlara işlerinde üstünlikler arzuw etdi.