Balkanabat şäherindäki 15-nji ýöriteleşdirilen orta mekdepde Türkmenistanyň nebitgaz senagatynyň taryhyna we häzirki gününe bagyşlanan temalaýyn synp sagatlary geçirilýär. Mugallymlar okuwçylary ýurdumyzyň hünärmenleriniň zähmet üstünlikleri bilen tanyşdyrýarlar we synp sagatlarynyň materiallarynda bellenilişi ýaly, sebitiň hem-de tutuş ýurduň ykdysadyýeti üçin esasy bolup durýan nebitçi hünäri barada gürrüň berýärler.

Bellenilişi ýaly, Günbatar Türkmenistan taryhy taýdan uglewodorod çig malynyň çykarylýan merkezi bolup durýar. Häzirki wagtda Gahryman Arkadagymyzyň hem-de Arkadagly Gahryman Serdarymyzyň aladasy bilen Günbatar Garagumda öňdebaryjy tehnologiýalary ulanmak arkaly ýataklary işjeň özleşdirmek dowam etdirilýär.

Okuwçylara önümçiligiň döwrebaplaşdyrylyşy: ýokary tehnologiýaly buraw desgalarynyň ulanylyşy, «Nebitgazylmytaslama» institutynyň işläp düzmeleriniň ylmy taýdan üpjün edilişi, gaz gysyjy stansiýalaryň işi hem-de çalşykly zähmet çekýänler üçin amatly şertleriň döredilişi barada jikme-jik gürrüň berilýär. Okuwçylar döwlet tarapyndan pudaga berilýän ulgamlaýyn goldaw barada hem maglumat alýarlar.

Geçirilýän hünäre ugrukdyryş çäreleri ösüp gelýän nesilde dogduk mekanyna bolan buýsanç duýgusyny terbiýeleýär, olary okuwda üstünliklere ruhlandyrýar we geljekde öz hünär ykbalyny Türkmenistanyň nebitgaz toplumy bilen baglamaga höweslendirýär.

Çeşme: «Nebit-gaz» gazeti