Aşgabatda Türkmenistanyň we Bangladeş Halk Respublikasynyň daşary syýasy edaralarynyň arasynda ilkinji syýasy geňeşmeler geçirildi. Wekiliýetlere Türkmenistanyň Daşary işler ministriniň orunbasary Ahmet Gurbanow we Bangladeş Halk Respublikasynyň Hökümetiniň Daşary işler ministrliginiň Gündogar we Günbatar ýurtlary bilen ikitaraplaýyn gatnaşyklar boýunça Sekretary ilçi Nazrul Yslam ýolbaşçylyk etdiler.

Gepleşikleriň barşynda ikitaraplaýyn gün tertibiniň esasy meseleleri boýunça pikirler alşyldy we iki döwletiň arasyndaky syýasy-diplomatik gepleşikleriň derejesine seredildi. Taraplar döwletara gatnaşyklaryň gerimini giňeltmek babatda ýokary we iň ýokary derejelerdäki saparlary guramagyň maksadalaýykdygyny, iki döwletiň daşary syýasat edaralarynyň arasynda yzygiderli gatnaşyklary saklamagyň ähmiýetini bellediler.

Abraýly halkara guramalaryň, hususan-da, Birleşen Milletler Guramasynyň çäklerindäki özara işjeň hereketleri kanagatlanma bilen nygtadylar.

Ilkinji syýasy geňeşmeleriň barşynda şeýle hem diplomatlar Türkmenistanyň we Bangladeşiň arasynda söwda-ykdysady hyzmatdaşlygy işjeňleşdirmegiň mümkinçiliklerini jikme-jik ara alnyp maslahatlaşdylar. Bellenilişi ýaly, şunda Türkmenistanyň Söwda-senagat edarasy bilen Dakkanyň söwda-senagat edarasynyň arasynda hyzmatdaşlygyň ýola goýulmagyna aýratyn orun degişlidir. Taraplar nebitgaz senagatyny, ulag babatynda özara aragatnaşygy, oba hojalygyny, dokma senagatyny we beýlekileri hyzmatdaşlygyň geljegi uly bolan ugurlary hökmünde kesgitlediler.

Medeniýet, bilim we syýahatçylyk ugurlarynda hyzmatdaşlygy ilerletmegiň mümkinçiliklerine hem seredildi.

Syýasy geňeşmeleriň ahyrynda söhbetdeşler özara gyzyklanma bildirilýän netijeli hyzmatdaşlygy dowam etdirmegiň möhümdigini nygtadylar.