Türkmenistanyň Birleşen Arap Emirliklerindäki (BAE) ilçisi Baýram Baýramow Dubaý şäherinde «Dragon Oil» kompaniýasynyň Baş ýerine ýetiriji direktory jenap Abdulkarim Al-Maazmi bilen duşuşyk geçirdi.

Duşuşygyň dowamynda Türkmenistan bilen Birleşen Arap Emirlikleriniň arasynda energetika pudagyndaky uzak möhletleýin hyzmatdaşlygyň strategik ähmiýeti we onuň ykdysady gatnaşyklary pugtalandyrmaga goşýan goşandy ara alnyp maslahatlaşyldy.

Şu nukdaýnazardan Türkmenistanyň ilçisi «Dragon Oil» kompaniýasynyň işiniň ikitaraplaýyn ykdysady gatnaşyklaryň möhüm bölegidigini belledi, «Dragon Oil» kompaniýasynyň ýolbaşçylary bolsa öz gezeginde institusional hyzmatdaşlygy berkitmäge gyzyklanma bildirdiler.

Söhbetdeşler özara bähbitli hyzmatdaşlygyň sebitiň energetika ösüşine gönükdirilen bilelikdäki başlangyçlary has-da giňeltmegiň geljegi barada pikir alyşdylar.

Duşuşygyň ahyrynda taraplar konstruktiw gepleşikleri dowam etdirmäge we häzirki wagtda alnyp barylýan operasion işler üçin durnukly şertleri üpjün etmäge taýýardyklaryny tassykladylar.