Aşgabatda 3-nji noýabrda gurluşyk, senagat we energetika pudaklaryna bagyşlanan CIET 2026 halkara maslahaty we sergisi açyldy. Forum Türkmenistanyň Söwda-senagat edarasynda geçirilýär. Çäre 5-nji noýabryna çenli dowam eder.

Çäre Türkmenistanyň ösüşiniň milli ileri tutulýan ugurlaryny maýa goýumlary, öňdebaryjy tehnologiýalar, halkara tejribe we işewürlik hyzmatdaşlygy bilen birleşdirýän halkara işewürlik meýdançasy hökmünde çykyş edýär. Çäräniň şygary — «Innowasiýa • Maýa goýumlary • Ösüş», slogany — «Geljegi gurýarys. Ösüşi berkidýäris.».

Forumyň işine döwlet edaralarynyň wekilleri, halkara kompaniýalar, maýadarlar, maliýe edaralary, tehnologiýa üpjünçileri, öndürijiler, binagärler, inženerler we pudak hünärmenleri gatnaşýar.

Guramaçylaryň maglumatyna görä, forumyň mowzugy üç tezise esaslanýar. Gurluşyk we binagärlik şäherleri, ýaşaýyş gurşawyny we infrastrukturany özgerdýär. Senagatyň ösüşi täze önümçilik kuwwatlyklaryny, ýerli önümçiligi we ýokary goşulan gymmatlykly önümleri aňladýar. Energetika bolsa senagatyň we infrastrukturanyň durnukly ösüşiniň binýady bolup durýar.

Üç günlük maksatnama strategik gepleşigi, halkara sergini, maýa goýum hyzmatdaşlygyny, tehnologiýa alyş-çalşygyny we hususy sektoryň ösüşini öz içine alýar. Mundan başga-da, forumyň çäklerinde öňünden guralan B2G we B2B duşuşyklary göz öňünde tutulýar.