Halkara energetika tehnologiýalary kompaniýasy bolan «Baker Hughes» Türkmenistanyň nebitgaz pudagynda buraw işleri, gorlary bahalandyrmak, känleri abadanlaşdyrmak hem-de önümçilik enjamlary bilen üpjün etmek ugurlarynda öz tejribesini ulanýar. Bu barada OGT 2026 forumynyň guramaçylary habar berdiler.

Kompaniýanyň işi gury ýerdäki hem-de Hazar deňziniň ýalpak ýerlerindäki känler bilen bagly taslamalary öz içine alýar. Şeýle hem «Baker Hughes» tarapyndan üpjün edilen enjamlaryň ulanylýan ugurlarynyň biri hökmünde Keýmir känindäki gazlift desgasyny görkezmek bolýar.

Kompaniýanyň halkara tejribesi serişdeleri netijeli peýdalanmak, önümçilik desgalarynyň ygtybarlylygyny ýokarlandyrmak we täze tehnologik çözgütleri ornaşdyrmak boýunça Türkmenistanyň nebitgaz pudagynyň ösüş maksatlaryna laýyk gelýär.

«Baker Hughes» ABŞ-nyň energetika tehnologiýalary boýunça iri kompaniýalarynyň biridir. Ol nebitgaz hyzmatlary, önümçilik enjamlary, gaz tehnologiýalary we sanly çözgütler boýunça dünýä bazarynda öňdebaryjy orunlaryň birini eýeleýär. Kompaniýanyň portfeli energetikanyň dürli ugurlaryny öz içine alýar, onuň hünärmenleri dünýäniň köp sanly ýurtlarynda halkara taslamalary durmuşa geçirýärler.