Hytaýyň PetroChina International kompaniýasy Singapurda suwuklandyrylan tebigy gaz (LNG) bilen deňiz gämilerine ýangyç guýmak boýunça ilkinji işini amala aşyrmagy meýilleşdirýändigini habar berdi. Reuters agentliginiň maglumatlaryna görä, kompaniýanyň ýolbaşçysy Wu Junli 15-nji oktýabrda Singapurda geçirilen halkara bunker ýangyjy maslahatynda bu meýilnamany mälim etdi. PetroChina International Singapuryň hökümetinden LNG bunkerlemek üçin ygtyýarnama alan sekiz kompaniýanyň biridir. Kompaniýa metanol ýangyjyny gämilere guýmak hyzmatyny hem ösdürýär. PetroChina-nyň maglumatlaryna görä, dünýäde LNG bunkerlemek hyzmatyny hödürleýän 220 töweregi port bar, metanol bilen bunkerlemek hyzmatyny amala aşyrýan ýa-da meýilleşdirýän portlaryň sany bolsa 50-den azdyr. Şeýle hem kompaniýanyň maglumatlaryna laýyklykda, PetroChina 2025-nji ýylda dünýä boýunça 7,95 million tonna bunker ýangyjyny satdy. Kompaniýa häzirki wagtda 16 sany şertnama esasynda peýdalanylýan bunker gämisiniň kömegi bilen 18 portda hyzmat hödürläp bilýär. Bu ugurdaky ösüş deňiz ulaglarynda alternatiw ýangyçlaryň ulanylyşynyň giňelýändigini hem-de LNG, metanol we degişli ýangyç üpjünçilik infrastrukturasynyň halkara logistika bazarynda ähmiýetiniň artýandygyny görkezýär.

Çeşme: https://www.reuters.com/business/energy/petrochina-carry-out-its-first-lng-bunker-fuelling-singapore-2026-10-15/