Awstraliýada içerki bazaryň tebigy gaz bilen üpjünçiligini berkitmäge gönükdirilen täze kanunçylyk teklibi halkara suwuklandyrylan tebigy gaz (LNG) bazarynyň gatnaşyjylarynyň ünsüni çekdi.
S&P Global Energy (Platts) neşiriniň maglumatlaryna görä, Awstraliýanyň hökümeti 14-nji oktýabrda içerki gaz üpjünçiligi boýunça täze kanun taslamasyny hödürledi. Onda LNG eksportynyň 20 göterimine deň bolan möçberde içerki gaz üpjünçiligi borçnamasy göz öňünde tutulýar. Täze düzgüniň 2028-nji ýylyň 1-nji ýanwaryndan güýje girmegi meýilleşdirilýär. Ýaponiýanyň iri energetika kompaniýasy JERA bu teklibiň uzak möhletleýin LNG üpjünçilik şertnamalaryna mümkin bolan täsirleriniň ünsli öwrenilmelidigini belleýär. Kompaniýanyň maglumatlaryna görä, 2025–2026-njy maliýe ýylynda onuň iş salyşan LNG möçberi takmynan 40 million tonna bolup, şol möçberiň 40 göterime golaýy Awstraliýanyň paýyna düşdi. Şeýle hem Awstraliýadaky Ichthys LNG taslamasynyň operatory INPEX kompaniýasy gaz önümçiligine täze maýa goýumlary çekmegiň we önümçilik kuwwatlyklaryny giňeltmegiň ähmiýetini nygtaýar. Ichthys taslamasynyň ýyllyk LNG önümçilik kuwwaty 9,3 million tonna deňdir.S&P Global-yň seljermesi içerki gaz üpjünçiligini sazlamak bilen halkara eksport şertnamalarynyň durnuklylygyny üpjün etmegiň arasynda ykdysady deňagramlylygy saklamagyň möhümdigini görkezýär.

Çeşme: https://www.spglobal.com/energy/en/news-research/latest-news/lng/101526-japans-jera-concerned-about-unintended-consequences-of-australias-gas-reservation-scheme