Türkmenistanyň Prezidentiniň Permany esasynda 2010-njy ýylyň 15-nji ýanwaryndan bäri bellenilýän Nebitgaz senagaty we geologiýa işgärleriniň güni her ýyl ýurdumyzda giňden bellenilýär. Bu senäniň taryhy-syýasy ähmiýeti ägirt uly bolup, Milli Liderimiz Gahryman Arkadagymyzyň döwlet Baştutany wezipesini ýerine ýetirýän döwründe — 2009-njy ýylyň 14-nji dekabrynda açylyp ulanmaga berlen Türkmenistan–Hytaý gaz geçirijisi bilen berk baglanyşyklydyr. Şol döwrebap gaz ulgamynyň işläp başlamagy bilen türkmen mawy ýangyjy taryhy ýoluny açdy, bu gün bolsa şol gün ýurdumyzyň energetika senagatynyň baýramy hökmünde kabul edilýär.

Energetika ugrunda uzak geljegi nazarlaýan syýasat

Hormatly Prezidentimiz Serdar Berdimuhamedowyň baştutanlygynda durmuşa geçirilýän energetika syýasaty milli ykdysadyýetiň daýanjy bolan nebitgaz pudagyny çalt depginde ösdürmäge, ony halkara energetika giňişligine üstünlikli goşmaga gönükdirilýär. Energetika taslamalary diňe bir ykdysady girdeji bermän, sebit we dünýä energetika howpsuzlygyny pugtalandyrmakda hem möhüm orun eýeleýär.

Türkmenistanyň baý uglewodorod gorlary dünýäde uly gyzyklanma döredýär. Şoňa görä-de ýurt öňdebaryjy nebitgaz kompaniýalary, abraýly maliýe guramalary bilen hyzmatdaşlygy giňeldýär. Energiýa howpsuzlygynyň häzirki talaplaryna laýyk gelýän täze infrastrukturanyň döredilmegi möhüm wezipeleriň biri bolup durýar.

“Galkynyş” — dünýä ähmiýetli äpet kän

Dünýäniň iň iri gaz känleriniň biri hasaplanýan “Galkynyş” käniniň syýasy we ykdysady ähmiýeti aýratyn bellemäge mynasyp. Bu kän tapgyrlaýyn özleşdirilmek bilen türkmen gazynyň halkara bazarlara iberiliş mümkinçiliklerini giňeldýär. Häzirki wagtda türkmen energiýa serişdelerine isleg ýokary bolup, halkara kompaniýalar ýurdumyz bilen hyzmatdaşlygy ösdürmäge uly gyzyklanma bildirýärler. Şeýlelikde, ýurdumyzyň köpugurly eksport syýasaty tebigy gazyň çykarylyşyny artdyrmak, gazhimiýa önümleriniň öndürilişini giňeltmek bilen berk sazlaşýar.

Soňky ýyllarda gurlup ulanmaga berlen döwrebap gazhimiýa toplumlary ýurdumyzyň eksport mümkinçiliklerini giňeldip, ýokary goşmaça bahaly önümleriň öndürilmegine ýol açýar.

2030-njy ýyla çenli maksatnamanyň möhüm ugurlary

“Türkmenistanyň nebitgaz senagatyny 2030-njy ýyla çenli ösdürmegiň Maksatnamasyna” laýyklykda önümçilik kuwwatlaryny artdyrmak, täze tehnologiýalary ornaşdyrmak, sanly ulgamlary giňden ulanmak işleri üstünlikli dowam edýär. Nebit we gaz ýataklarynda häzirki zaman innowasion çözgütler giňden ulanylyp, öndürijilik ýokarlandyrylýar. Şeýle hem ekologik talaplara laýyklykda, daşky gurşawy goramak, metan zyňyndylaryny azaltmak, howanyň üýtgemegi bilen bagly global meseleleri çözmäge goşant goşmak boýunça giň möçberli işler alnyp barylýar.

Türkmenistan dünýäniň ekologik başlangyçlaryna işjeň gatnaşýar. Dubaýda geçirilen BMG-niň COP28 maslahatynda ýurdumyz Ählumumy metan borçnamasyna goşulýandygyny resmi taýdan mälim etdi. Bu çözgüt nebitgaz pudagynyň öňünde täze wezipeleri goýdy we işgärlerimiz şol maksatlara laýyk işler alyp barýarlar.

Täze ýataklar, täze taslamalar, dünýä derejesindäki üstünlikler

Ýurduň günorta-günbatarynda açylan täze nebit känleri, şeýle hem “Türkmenistan–Hytaý”, “Gündogar–Günbatar” gaz geçirijileri we gurluşygy dowam edýän TAPI halkara gaz geçirijisi ýurdumyzyň energetika taryhynyň möhüm üstünlikleridir.

Türkmen energiýa serişdelerine isleg bildirýän ýurtlaryň sany ýylsaýyn artýar. Bu bolsa ýurdumyzyň eksport ugry boýunça alyp barýan köpugurly syýasatynyň dogrydygyny subut edýär.

“Türkmenistanyň nebiti we gazy — OGT 2025” halkara forumy: rekordlar we üstünlikler

2025-njy ýylyň 22–24-nji oktýabrynda Aşgabat şäherinde geçirilen “Türkmenistanyň nebiti we gazy — OGT 2025” atly 30-njy Halkara maslahaty we sergisi ýurdumyzyň energetika pudagynyň halkara derejesinde üstünligini ýene-de bir gezek açyk görkezdi.

“Energiýa. Innowasiýalar. Ösüş.” şygary bilen geçirilen foruma 70 ýurtdan 1400-den gowrak wekiliň gelmegi halkara ynamynyň belentdigini açyga çykardy. Sergä 100-den gowrak kompaniýanyň gatnaşmagy bolsa geçen ýyl bilen deňeşdirilende 45% ösüş gazanylandygyny görkezdi.

Forumyň esasy çykyşçylarynyň arasynda DEWA, ENOC, S&P Global, IGU, BOTAŞ, SOCAR ýaly dünýäniň energetika gigantlarynyň ýolbaşçylarynyň çykyş etmegi çäräniň abraý derejesini has-da belende göterdi.

Bitaraplygyň 30 ýyllygyna bagyşlanan halkara hyzmatdaşlygyň şöhraty

Forum Türkmenistanyň hemişelik Bitaraplygynyň 30 ýyllygyna gabat gelip, onuň halkara hyzmatdaşlygyň berk binýadydygyny ýene bir gezek görkezdi. Galkynyş käniniň ösüşi, TAPI taslamasy, Hazar deňzindäki täze bloklaryň özleşdirilmegi bu syýasatyň netijeli ädimleridir.

OGT Awards Gala dabarasynda yzygiderli hyzmatdaşlyk eden hem-de innowasiýa goşant goşan kompaniýalar sylaglandy. Şeýle hem OGT 2026 boýunça taýýarlyk işleriniň başlandygy, geljekki forumda emeli intellekt, wodorod energetikasy we täzelenip bilýän energiýa ýaly ileri tutulýan ugurlaryň öňe çykaryljakdygy mälim edildi.

Nebitgaz senagaty we geologiýa işgärleriniň güni diňe bir hünär baýramçylygy bolman, eýsem Türkmenistanyň energetika ösüşiniň, halkara hyzmatdaşlygynyň we ykdysady rowaçlygynyň şöhratly şöhlelenmesidir. Bu pudakda zähmet çekýän müňlerçe hünärmenleriň tutanýerli işi arkaly ýurdumyzdaky energetika taslamalary dünýä derejeli üstünliklere öwrülýär.

Bu uly senäniň hemmetaraplaýyn üstünliklere, täze sepgitlere, täze taslamalara badalga bermegini arzuw edip, ýurduň ähli nebitçi-gazçylaryny we geologlaryny baýramlary bilen tüýs ýürekden gutlaýarys!

Toýly Çaryýew,

"Türkmennebit" döwlet konserniniň Önümi paýlaşmak hakynda ylalaşyklar müdirliginiň Gepleşikler, şertnamalar we ygtyýarnamalar bölüminiň baş hünärmeni